حدیقہ کیانی کی سیلاب متاثرین کے لیے عوام سے فوری مدد کی اپیل

معروف گلوکارہ اور سماجی کارکن حدیقہ کیانی نے حالیہ سیلاب سے متاثرہ علاقوں کے مکینوں کے لیے عوام سے دل کھول کر مدد کرنے کی اپیل کی ہے۔ انہوں نے کہا ہے کہ ملک کے مختلف حصوں میں آنے والے تباہ کن سیلاب نے ہزاروں لوگوں کو بے گھر کر دیا ہے، اور متاثرہ خاندان خوراک، پینے کے صاف پانی، کپڑوں، کمبلوں اور ادویات کے لیے ترس رہے ہیں۔ حدیقہ کیانی ان دنوں خود بھی ریلیف سرگرمیوں میں مصروف ہیں اور قصور، ننکانہ صاحب، شیخوپورہ اور دیگر علاقوں میں امدادی سامان پہنچا رہی ہیں۔ انہوں نے عوام سے اپیل کی ہے کہ وہ عطیات، راشن، اور طبی امداد کے ذریعے متاثرین کی مدد کریں تاکہ ان کی زندگیوں کو دوبارہ معمول پر لایا جا سکے۔ ان کا کہنا ہے کہ مشکل کی اس گھڑی میں ہمارا انسانیت کے ناطے ایک دوسرے کا ساتھ دینا نہایت ضروری ہے۔