پاکستانی نژاد سلیکون ویلی کے معروف کاروباری شخصیت ریحان جلیل نے ایک اور تاریخی کارنامہ سرانجام دیا ہے — ان کی قائم کردہ کمپنی Securiti AI کو امریکی ٹیکنالوجی کمپنی Veeam Software نے تقریباً 1.7 ارب امریکی ڈالر (تقریباً 480 ارب پاکستانی روپے) میں خرید لیا ہے۔ یہ پاکستان کے کسی بھی ٹیک اسٹارٹ اپ کے لیے اب تک کی سب سے بڑی عالمی سطح کی خریداریوں میں سے ایک قرار دی جا رہی ہے۔
Securiti AI نے دنیا بھر میں اپنی شناخت “Data Command Center” کے ذریعے بنائی، جو ایک جدید پلیٹ فارم ہے جو کمپنیوں کو اپنے ڈیٹا کی حفاظت، پرائیویسی مینجمنٹ، اور آرٹیفیشل انٹیلیجنس (AI) گورننس کے تقاضوں کو پورا کرنے میں مدد دیتا ہے۔ یہ سسٹم مختلف کلاوڈ، SaaS، اور آن پریمیس ڈیٹا ذرائع سے حساس معلومات کو شناخت اور منظم کرتا ہے، تاکہ کمپنیاں عالمی قوانین جیسے GDPR اور CCPA پر عملدرآمد کر سکیں۔
ریحان جلیل، جو پاکستان میں پیدا ہوئے اور بعد ازاں امریکہ منتقل ہوئے، نے Securiti AI کی بنیاد 2019 میں رکھی تھی۔ ان کا مقصد ایک ایسی سیکیورٹی کمپنی بنانا تھا جو ڈیٹا کو نہ صرف محفوظ رکھے بلکہ مصنوعی ذہانت کے دور میں پرائیویسی کے عالمی معیار قائم کرے۔ کمپنی نے تیزی سے ترقی کی اور گوگل، مائیکروسافٹ اور ایمازون سمیت کئی بڑی ٹیک کمپنیوں کے ساتھ شراکت داری کی۔
Veeam Software کے ساتھ یہ معاہدہ نقد اور اسٹاک دونوں صورتوں میں کیا گیا ہے۔ معاہدے کے بعد ریحان جلیل کو کمپنی میں صدر برائے سیکیورٹی اور AI کے طور پر تعینات کیا گیا ہے، جہاں وہ عالمی سطح پر ڈیٹا پروٹیکشن اور AI گورننس کی نئی پالیسیوں کی قیادت کریں گے۔
