محکمہ موسمیات اور نیشنل ڈیزاسٹر مینجمنٹ اتھارٹی (NDMA) نے پیش گوئی کی ہے کہ سرد اور خشک سائبیرین ہوائیں رواں سال نومبر کے آخر سے پاکستان میں داخل ہونا شروع ہو جائیں گی۔ ان ہواؤں کے اثرات سب سے پہلے بلوچستان اور خیبرپختونخوا کے بالائی علاقوں میں ظاہر ہوں گے، جہاں درجہ حرارت میں نمایاں کمی متوقع ہے۔ اس کے بعد ان ہواؤں کا رخ پنجاب، سندھ اور کشمیر کی طرف ہوگا، جس سے پورے ملک میں سردی کا آغاز ہو جائے گا۔
ماہرینِ موسمیات کے مطابق یہ سائبیرین ہوائیں وسط ایشیا سے چل کر پاکستان میں داخل ہوتی ہیں اور عام طور پر سردیوں کے آغاز کا عندیہ دیتی ہیں۔ اس دوران شمالی علاقوں جیسے گلگت بلتستان، چترال، اسکردو، دیر اور سوات میں ہلکی سے درمیانی برفباری کا امکان ہے، جب کہ میدانی علاقوں میں ٹھنڈی ہوائیں، دھند اور سموگ میں اضافہ ہو گا۔
محکمہ موسمیات نے شہریوں کو مشورہ دیا ہے کہ وہ موسم کی تبدیلی کے پیشِ نظر گرم کپڑوں کا استعمال شروع کریں، بچوں اور بزرگوں کو ٹھنڈی ہواؤں سے محفوظ رکھیں، اور سموگ کے دوران ماسک پہننے سمیت احتیاطی تدابیر اختیار کریں۔ ساتھ ہی ڈرائیوروں کو ہدایت کی گئی ہے کہ وہ دھند کے موسم میں فوگ لائٹس کا استعمال کریں اور سفر سے قبل موسم کی صورتحال ضرور چیک کریں۔
