اقوام متحدہ نے افغانستان میں انسانی حقوق کی سنگین صورتحال پر شدید تشویش کا اظہار کرتے ہوئے کہا ہے کہ ملک انسانی حقوق کے لیے “قبرستان” بنتا جا رہا ہے۔ ادارے کے نمائندوں کے مطابق وہاں خواتین، بچوں اور اقلیتوں کو بنیادی حقوق کی فراہمی میں شدید رکاوٹوں کا سامنا ہے، جبکہ تعلیم، روزگار اور آزادیٔ اظہار پر عائد پابندیاں عالمی انسانی حقوق کے اصولوں کے خلاف ہیں۔
رپورٹ میں خاص طور پر خواتین کی تعلیم اور ملازمت پر عائد قدغنوں کو تشویشناک قرار دیا گیا ہے اور کہا گیا ہے کہ یہ اقدامات نہ صرف سماجی و معاشی ترقی میں رکاوٹ ہیں بلکہ بین الاقوامی قوانین کی بھی خلاف ورزی ہیں۔ اقوام متحدہ نے عالمی برادری پر زور دیا ہے کہ وہ افغان عوام، خصوصاً خواتین اور بچوں کے تحفظ اور بنیادی حقوق کی بحالی کے لیے مؤثر اور فوری اقدامات کرے۔
