کراچی میں پاکستان کا پہلا ڈرون بیسڈ ای چالان سسٹم متعارف

کراچی میں ٹریفک نظام کو جدید بنانے کی جانب ایک بڑا قدم اٹھاتے ہوئے پاکستان کا پہلا ڈرون بیسڈ ای چالان سسٹم متعارف کر دیا گیا ہے۔ اس نئے نظام کے تحت ڈرون کیمروں کے ذریعے شہر کے مصروف علاقوں، خصوصاً صدر اور زیب النسا اسٹریٹ میں ٹریفک قوانین کی خلاف ورزیوں کی فضائی نگرانی کی جاتی ہے۔ ڈرونز غیر قانونی پارکنگ، غلط لین میں گاڑی چلانے اور دیگر خلاف ورزیوں کی فوری نشاندہی کرتے ہیں، جس کے بعد بغیر کسی انسانی مداخلت کے خودکار طور پر ای چالان جاری کر دیا جاتا ہے۔ ابتدائی آپریشن میں دو گاڑیوں کو غیر قانونی پارکنگ پر فوری جرمانے کیے گئے۔ حکام کے مطابق اس ٹیکنالوجی کا دائرہ مزید علاقوں جیسے طارق روڈ، راشد منہاس روڈ اور دیگر اہم کمرشل زونز تک بڑھایا جائے گا۔ انتظامیہ کا کہنا ہے کہ ڈرون بیسڈ ای چالان سسٹم سے نہ صرف ٹریفک مینجمنٹ بہتر ہوگی بلکہ شفافیت میں بھی اضافہ ہوگا اور خلاف ورزی کرنے والوں کے خلاف مؤثر کارروائی ممکن ہو سکے گی۔