دنیا بھر میں اسلام کے امن، محبت اور برداشت کے پیغام کو عام کرنے والے معروف مبلغِ اسلام مولانا طارق جمیل کو عالمی سطح پر ایک اور اہم اعزاز حاصل ہوا ہے۔ اردن کے شاہی ادارے “دی رائل اسلامک اسٹریٹجک اسٹڈیز سینٹر” (The Royal Islamic Strategic Studies Centre) نے اپنی سالانہ رپورٹ “دی مسلم 500” میں مولانا طارق جمیل کو دنیا کے 50 بااثر ترین مسلمانوں میں شامل کیا ہے۔
یہ فہرست ہر سال اُن مسلم شخصیات پر مشتمل ہوتی ہے جو مذہب، سیاست، علم، میڈیا، سائنس، سماجی خدمات اور ثقافت کے میدانوں میں نمایاں کردار ادا کر رہی ہیں۔
مولانا طارق جمیل کو اس فہرست میں شامل کیے جانے کی بڑی وجہ ان کا اخلاق، رواداری، اتحادِ امت اور دعوتِ دین کے مثبت اور مؤثر انداز میں پیغام پہنچانا ہے۔
مولانا طارق جمیل کی تقریریں نہ صرف پاکستان بلکہ دنیا بھر کے مسلمانوں پر گہرا اثر ڈالتی ہیں۔ وہ نفرت، فرقہ واریت اور شدت پسندی کے خاتمے کے لیے ہمیشہ محبت، بھائی چارے اور انسانیت کا پیغام دیتے رہے ہیں۔ ان کی تبلیغی کوششوں نے لاکھوں دلوں کو بدل دیا ہے اور نوجوان نسل کو دینِ اسلام کی اصل روح سے روشناس کرایا ہے۔
یہ اعزاز پاکستان کے لیے بھی باعثِ فخر ہے کیونکہ مولانا طارق جمیل واحد ایسے پاکستانی مذہبی رہنما ہیں جنہیں عالمی سطح پر اتنی بڑی فہرست میں مستقل طور پر شامل کیا جاتا ہے۔
