پی آئی اے نے ریٹائرڈ ملازمین کی میڈیکل سہولیات بند کر دیں

پی آئی اے کے ریٹائرڈ ملازمین کے لیے میڈیکل سہولیات مکمل طور پر بند کر دی گئی ہیں، جس کے باعث سابق ملازمین میں شدید تشویش اور بے چینی پائی جا رہی ہے۔ ذرائع کے مطابق قومی ایئرلائن کو درپیش مالی مشکلات کے باعث یہ فیصلہ کیا گیا ہے، جس کے تحت ریٹائرڈ ملازمین اور ان کے اہل خانہ کو فراہم کی جانے والی طبی سہولیات ختم کر دی گئی ہیں۔ متاثرہ ملازمین کا کہنا ہے کہ انہوں نے ادارے کی خدمت میں اپنی زندگیاں گزاریں، اور اب ریٹائرمنٹ کے بعد بنیادی طبی سہولت سے محروم کرنا ناانصافی ہے۔ دوسری جانب پی آئی اے انتظامیہ کا مؤقف ہے کہ ادارے کو مالی استحکام دینے کے لیے مشکل فیصلے ناگزیر ہو گئے ہیں، تاہم اس حوالے سے مزید اقدامات اور ممکنہ متبادل پر غور کیا جا رہا ہے۔