سابق امریکی گلوکارہ جینیفر گروٹ (Jennifer Grout)، جو عربی گیتوں اور کلاسیکی مشرقی موسیقی کے لیے جانی جاتی ہیں، نے اسلام قبول کرنے کے بعد الجزیرہ کے ایک پروگرام میں قرآن مجید کی تلاوت کر کے لاکھوں دلوں کو مسحور کر دیا۔ ان کی تلاوت کا ویڈیو کلپ سوشل میڈیا پر تیزی سے وائرل ہو رہا ہے، جس میں وہ نہایت پرسوز اور دلکش آواز میں قرآن کی آیات پڑھتی نظر آتی ہیں۔
جینیفر نے انٹرویو کے دوران بتایا کہ عربی زبان اور مشرقی موسیقی سے ان کی وابستگی نے انہیں اسلام کی طرف مائل کیا۔ وہ مراکش میں قیام کے دوران عربی زبان اور قرآن فہمی سے متاثر ہوئیں، جس کے بعد انہوں نے اسلام قبول کرنے کا فیصلہ کیا۔ ان کا کہنا تھا کہ قرآن کی تلاوت کرتے وقت انہیں روحانی سکون، قربِ الٰہی اور اندرونی اطمینان کا احساس ہوتا ہے، جو کسی اور تجربے سے نہیں مل سکتا۔
انہوں نے مزید کہا کہ وہ اپنی زندگی کو اسلامی تعلیمات کے مطابق ڈھالنے کی کوشش کر رہی ہیں اور چاہتی ہیں کہ ان کا سفر دوسروں کے لیے بھی ہدایت اور امن کا ذریعہ بنے۔ ان کی تلاوت نے نہ صرف مسلمانوں بلکہ غیر مسلم ناظرین کو بھی گہرے روحانی اثر میں مبتلا کر دیا۔
